Messi ya ci kwallonsa ta 500

Gwarzon dan wasan kwallon kafar nan mai taka leda a Barcelona, Lionel Messi ya zura kwallonsa ta 500 a rayuwarsa ta wasan kwallon kafa.

Lionel Messi na Barcelona Reuters/Toby Melville

Messi dai ya ci wannan kwallon ne a fafatawar da Valencia ta doke Barcelona da ci 2-1 a gasar La Liga ta kasar Spain.

Duk da dai kwallon da Messi ya ci, hakan bai sa Barcelona ta kai ga gaci ba, kuma a karo na farko kenan tun shekara ta 2003 da kungiyar ta yi rashin nasara sau uku a jere  a gasar ta La Liga.

Watanni biyu da suka gabata, Barcelona ta caccasa Valenica da ci 7-0 a Camp Nou amma ana iya cewa yanzu kungiyar ta rama abinda aka yi ma ta.

Yanzu haka Atletico Madrid ta yi kan- kan-kan da Barcelona wajen maki, inda suke da maki 76. Sai dai duk da hakan Barcelona ce ke jan ragama a teburi.

Atletico dai ta samu karin maki ne bayan ta lallasa Granada da ci 3-0 kuma ta na da wasanni guda biyar da za ta yi nan gaba.

Ita kuwa Real Madrid na da maki 75, tazarar maki guda kenan tsakaninta da Barcelona da Atletico.