Har yanzu akwai sauran aiki a gabanmu - Messi

Gwarzon dan wasan Barcelona Lionel Messi ya ce, nasarar da suka samu kan Liverpool a zagayen farko na wasan kusa da na karshe a gasar zakarun Turai da kwallaye 3-0, ba ya nufin suna da tabbacin kaiwa wasan karshe.

Lionel Messi. REUTERS/Albert Gea

A cewar Messi, ya so adadin kwallayen da suka jefa ya kai 4, amma duk da haka, abin alfahari nasarar da suka samu, sai dai ya bukaci su zage damtse a mako mai kamawa, idan suka yi tattaki zuwa Ingila don sake karawa da Liverpool a filin wasa na Anfield.

Messi ne dai ya zura kwallaye 2, yayin da Suarez ya ya jefa guda.

Zalika kwallaye biyun da Messi ya jefa a ragar Liverpool jiya, sun sa adadin kwallayen da ya ci wa kungiyarsa ta Barcelona kaiwa 600 a jimlace.

Tuni dai mai horar da kungiyar Liverpool Jurgen Klopp ya ce ba shakka ya amince cewar, ba za su iya dakile bajintar dan wasan Barcelona Lionel Messi ba.