Yawan wadanda suka kamu da Korona ya zarce mutane miliyan 75 a Turai

Yawan wadanda suka kamu da cutar Korona a Turai ya zarce mutane miliyan 75, a daidai lokacin da hukumomin kasashen nahiyar ke daukar matakan dakile yaduwar sabon nau’in cutar na Omicron, lamarin dake neman zama kadangaren bakin tulu ga jami’an lafiya.

Wani likita yayin kula da mara lafiya a Asibitin Clinical Lamba 52, inda ake kula da mutanen da ke fama da cutar Korona a birnin Moscow, dake Rasha. Ranar 21 ga Oktoba, 2021. © REUTERS/Maxim Shemetov/Files

Sai dai a Birtaniya, rahoton da hukumar kididdigar kasar ta fitar ya nuna cewa an samu karin yaduwar Korona a sassan kasar, sai dai nau’in cutar an Delta ne yayi tasiri wajen hakan sabanin sabon nau’in Omicron da ya bayyana daga Afirka ta Kudu a karshen watan Nuwamban da ya gabata.

A kasar Rasha kuwa, adadin wadanda suka mutu a dalilin annobar ta Korona ya kai a kalla dubu 578 da 20, adadi mafi muni na uku a duniya.

A cewar Hukumar Lafiya ta Duniya WHO, an gano sabon nau'in cutar a cikin kasashe 38, kari daga adadin kasashe 23 cikin kwanaki biyu kacal da suka gabata.