Shugaban kasar China zai gana da shugabannin kasashen Afirka a taron BRICS

Shugaban kasar China Xi Jinping, zai gana da shugabannin kasashen Afirka a gefen taron BRICS a mako mai zuwa, a wani matyaki na bunkasa alakar China da Afirka.

Shugaban China China Xi Jinping kenan a wani taron BRICS da ya gudana a Afirka ta Kudu ranar 26 ga watan Yuli, 2018. REUTERS - POOL

Za a yi taron ne da yammacin ranar Alhamis, wato ranar karshe ta taron na kwanaki uku, in ji Chen Xiaodong jakadan China a Afirka ta kudu a wani taron manema labarai.

An kebe ranar ne domin gudanar da bukukuwan da suka hada da kasashe sama da 70 da aka gayyata a matsayin aminan kungiyar BRICS, wadanda suka hada da Brazil, Rasha, Indiya, China da Afirka ta Kudu.

A ranar Talata, Xi zai kai ziyarar aiki ga shugaban kasar Afirka ta Kudu Cyril Ramaphosa a birnin Pretoria, daga bisani kuma ya wuce birnin Johannesburg don halartar taron, wanda zai kasance ziyararsa ta biyar a Afirka ta Kudu tun bayan da ya zama shugaban kasa a shekarar 2013.

Mu'amalar kasar China da shugabannin Afirka za ta biyo bayan taron Rasha da Afirka da aka yi a watan da ya gabata a birnin St Petersburg, inda shugaba Vladimir Putin ya gudanar da taron koli da shugabannin kasashen Afirka 17 da suka halarci taron daga cikin kasashen Afirka 54 da aka gayyata.